صدگيني احبچ دوم
يا بغداد .. ما ناسيچ
وعلى تراب المطار انزفت روحي
دمع منگوع بالشوغات
ملح ابيض .. ورد .. شتلات
شنسى يا مدينتنا.. الصحن
(والكاظم) المهيوب
السطر بالسجن صبره
وكتب آيات
غرفتي .. صورة أمي
حديقتنا..
اوراق العمر منشورة
بالدايات
(علي الوردي) شايل كتابه
على دروب العلم والذات
تمثال (الكاظمي) او (محفوظ)
(محمد النقدي) العلمني قصيدة حب
مكتوبة بالعبرات
واول عشگ من فارگ
الوردات
اول حرف خطيته عالحيطان
يسقط تمثال الطاغية (صدام)
اول معتقل .. كتب بي عنواني
وعنواني العراق .. ورقصة السعفات
مكتبت البراءة
ولا صرت بعثي
اكتبت هذا آخر نشاط
او كذب ما گلته
بعدني اكتب شعر.. للعمال،
للماشين فوگ الماي
لاطفال الرصيف..
وضحكة الحلوات
شذكر يا حزن بغداد
(ابوالعيس) السگه بدمه
سبع نخلات
(متروك) الحرگ دبابة الاقزام
على جسر المنايا ومات
وليحب ترابه.. او گاعه.. والفقره
ابد ما مات
شذكر يا عراق الخير
(قصر النهاية) او وگفة الابطال
رسموا على باب السجن
نجمات
ومن ينسى (سلام) (العبلي) او (حمزة)
الرفعوا للمنايا سيوف
ما تنشاف
وگاموا كسروا التابوت
ومن ينسى (قطار الموت) و (السريع(
الرگص فوگ المشنقه يغني
الوطن ميموت
الوطن باقي رغم القهر.. والجور
والطاغوت
راية مرفوعة على الهامات
ومن اذكر دمع الارملة بالحرب مال ايران
اكتب سورة الايمان
وامسح بالندم.. والخوف ذاكرتي
واسطرها شعر مخنوگ بالآهات
ومن ينسى الحصار الجوع الوادم
سنين طوال .. ومن القهر
ومن الصبر.. صار التمر خبزات
او من أقرأ (الطريق) افرح اباشعاري
الكاتبه للحافي.. والجوعان.. والعطشان
للمحروم.. والمقهور
الباچر احلى اهوايه او كلش
بلا دمعة.. ولا أنات
اذكرچ دوم يا بغداد
واتمنى اجي بالنوم
اشوفچ حلوة فرحانة
تزگين الفرح زخات
وارسمچ بالدمع فرحة
وعزف نايات
اشبگچ حيل.. مثل شبگة طفل مفطوم
ينام نص الليل بالحسرات
وتبقى يا عراق الخير
گامة مرفوعة على الگامات
ومن ينسى (الصدر)
من قاوم الطغيان
نذر روحه.. كتاب
بين العنوان والاعمال بالنيات
ومن ينسى (الجواهري) الدوخ بشعره
الشعر.. وطوع الچلمات
ومن ينسى (النواب) او (كاظم) او (عريان)
ما باعوا ضمير الشعب دولارات
وابو (طلعت) الكتب شعره
على سعف النخل نغمات
شذكر يا عراق الخير
رموز الفكر والتاريخ والاعلام
علگوا من اصابعهم على دروب العلم
شمعات
شذكر (السياب).. (البياتي) و (سعدي) و (العامل)
التركوا على تراب الوطن بصمات
تظل ذيچ القصايد صرخة مدوية
او يدفع يحرگ الظلمات
صدگيني اصبح دوم
يا بغداد
ومن اشوفچ بالحلم تتصاعد
الزفرات
بالغربة الوطن احلى
وبالغربة لا ضحكة فرح.. لا بسمة
لا همسات
ياموطناً..
على ترابك مدفونين أئمتنا
اعلام الورى .. والدين .. والايمان
وبعدنا ندفع الديات
احب بغداد مثل امي
وبالغربة لا صدر دافي.. لفرحة عيد
لا چوبية .. لا ضحكات
شتريد مني ياعشگ بغداد
عوفني بحالي .. خطيه
والعمر هم فات
وقطار الغربة يسحگني
بلا سچة .. وبلا خطوات
يا عراق الخير .. ما انساك
ما ناسيچ يا بغداد
وهاي سنة التكوين
وهاي اسرار الحياة
يا عراق الخير .. لا تهتم
بس تصيح :
(يا حيدر.. علي.. الكرار)
تجي اسرار الحمام
وتمسح الدمعات