العصر ناوي اعالرحيل
وليلنه المجبل علينه
يالله يا كلبي تحضر للونين
الناس مرتاحة بعشكها
الناس كلمن ولفه يمه
واحنه بس  لمفاركين
مفاركين وننتظر وآدم نسونه
مدري ليش مناطرين!!!
كافي ياكلبي دخذ دور القطار
ليش دوم انته المحطة ..
وهمه دوم مسافرين
كافي تحجي ويالمراسيل..
 الي اصلاً ما نكتبت!!!
وجملتك بطلها هاي
“انته يا مرسال ولفي..
 شما بطيت اتصير غالي”
وخلي يحله بعين شخصك ولف ثاني
اليمته تبقى تردد انته..
 (غير شخصك ما حلالي )
ما حلالي وما حلالي
انته راضي بحالتك سولفلي كول ؟؟
اتهفي للصورة وترد تشتمها حيل
عود تا تشتم عطرهم!!!
صير غالي ولاتذل روحك شبيك !!
ليش تنطي الروح كلي
 الوادم انطونه ظهرهم!!!!!
كافي متشتت وحاير
وكافي وي روحك تسولف
هذا منهو يجرني شمعة النص هوه
هذا منهو براسي يفتر )؟!؟!
هذا منهو يجرني فانوص الضوه
عادت الفانوص مايهوه ابد جيت الصباح
وعمره يخلص من يطل خيط الفجر
كافي ياكلبي عليمن ساكت انته؟!؟
كله ما يتراهمن مي وجمر
   اصحى يا كلبي وتهده
وعلى فد رأي استقر
كافي تزرع شوكهم وسط الدليل
وهمه اصلا نسو شخصك
شوكك الهم مني اخذها ابد مابي اي ثمر
انته جبت العمر كله ابهلمحطة
ولجن ما فد مرة صاعد بالقطار !!!
وبسببهم وبسبب جلمة نجيكم ونطرونه
اسنيني ضاعت خلص كل عمري انتضار
وتالي ضاع العمر لكن وينهم !!!
سولفلي اجوك!
ما اجوك ولا يجون
حته ما تعرف يكلبي همه وين؟
الي راحو بعد راحو
جلمة اخير احجيلهم
وأنهي المسير
يالله كللهم
يكلبي امودعين
امودعين امودعين
بالسلامة امودعين