لذة من تضحك عيونك
لليحب والما يحب
تنشتل فوگ الجفون ورود
شدّه ملوّنة بوسات عيد
تنزع الدنيه حزنها
وترگص لطول الهدب
صفره حمره خضره زرگه
زرگه من زرگه عيونك
يا سِمه عيونك تزخ نجوم
ليلو
وجهك يسودن عشگ
ضوّي يا ليل الحزن ما ظل تعب
ما ظل حزن وياك يا چكليت
توفي ملبّس وزفة عرس
شوفتك ماي وعطش
بارد عذبْ
ملگاك بكچة تين عسل گبل وكته
ذب حلاته إعله العنب
من أضوگه يشيل روحي
وما يهدني من العتب
يا شلب مشخاب عنبر
يغار من عطر الشلب
ما ظل عتب ما ظل زعل
ما ظل تعب
يوم المطرت دنيانه شوگ
ومن تعلمنا نحب
– – –
سولف يا بعد الروح لا تسكت
تره السكته خطيئة
إعليك بالحب تنحسب
لا تخاف وتلوي جيدك، عالوجه
كل شي انفهم
كل شي انكتب
احچي التريده حتى لو يبّس شفافك
خوف راح المبسم ينگط ذهب
رقه واحساس ومشاعر مستحيل
الها وصف كلك ذهبْ خجلان منك
واستحي من عيونك ترمش جفنها
خوفي منها
تصير للزعله سبب
لذّة من تنده باسمي وألذ من صوتك أسمعك
من تحاچيني يبلل گصتك ماي الورد
تلالي يا شذرة المحبس زرگه عيونك
عجيبة وانته أحلى من العجب
خو موش كلفه اعليك لو ضميت لي
بگلبك وصيّة
من تحاچيني تغمض
بعد ما عندي گلب…