عرفتك!!
صوت يتمرجح ابوحشة ليل..!!
ومن ينطر فجر ينرسم بعيونك..
وعرفتك.. گمر لوسافر يجيب احباب
ونته أول حبيب وبي يبشرونك.
وعرفتك مو، زهير، اجمل، ندين الروح..
واهيسك. چني واحد من ينادونك..!
وعرفتك.. بالمسافة ما طحت ومشيت!!
مملي، اشواگ. نرجس، لليحبونك..
وعرفتك.. ساجيه اتفيض بشحيح الماي
بضفيرة سنبلك عنبر يشتلونك
وعرفتك. لو يزورك حلم من عشاگ..
تذوب ابگد حلمهم من يزورونك..
وعرفتك موقف ابظنكة جحيم الموت
يا موقف، مهابة وشالته امتونك
يا صبيرة، الغربة وعذاب اهموم
يا سرب النوارس من يعدونك..
يا شفة عطش يا وجع صوت الناي..
يا خيط الضوه بالظلمة يمشونك..
يا بيدر نضال وتفگها نواطير..
حسبالي الوفة انعده سوه وياك..
بس حسبالي ظلت..!! حايرة بدونك
يا ورگة الخس الترفة من تنجاس
تشهد ورگة الخس من يميزونك
الطيور الطايرة ابغربتهه ردت ليك
تعزي الشعر بسّمك من يعزونك
غيابك!
فتح ابروحي اشكثر بيبان
ما يرهم قفل بوب ويسدونك
وجهك طين حري وبي أثر شطين..
ومن جرف الفرات ودجلة من لونك
چذب..!!
موتك گبر واسمك گبر مكتوب..!!
وما صدگ گبر موت ويخطونك
عدل..
باقي نخل يا ثمرة الگنطار..
چذب.
يا بو هدف لا يا صديق الزاد
يالتسأل عليه ابچلمة اشلونك
چذب وجه الحنان من الشمس مبيوگ
الشمس تزعل إذا منهه يبوگونك
القدر يركض جسر ما عبر الماشي..
بس انته جسر للحب يعبرونك
إبرة وخيط احنه والحزب خياط..!!
وثوب العافية بإيد اليخيطونك..
يتنده الورد لو اسمك ايمر بيه..
واذا غاب النده حتماً يغيبونك
طرزت الرمل باجمل أغاني الناس..
وخل ترتاح نجوى ابشفة اظنونك
وهلچ وين ينجوى؟
خيعون الثقافة وحبر كل قرطاس..
المثلك أنجبت يا ترف خيعونك
أغمض اعيوني بعدك واسكن الحيطان
وانطي..!!
امراد عمري لليذكرونك..
ــــــــــــــــــ
* (عبود البيدر) : اسم  الحزبي للراحل زهير الدجيلي