بَيَّتت شَدَّة ياس
معكَودة بسبع بوسات
وَي شباج إمام الورد ، والحضرة هلاهل
والصحن رايات وبخور وضوه ، وادعيات وصواني نذور
وازنود جمَّار إو ورى كحل العبي امرايات زَفّة
إو واهليه بكل كتر للنالو امراد ، وإجو برداس
وجفافيهم البيضه حمام إيطير
وايطير الملبس
والحمام يطير
ودموع الفرح ترسم على احجولة جناجل
والحرير الشام
نام النعاس الحلو
وبَرَّد الحضرة
والخُضره النديَّة
واشتهى المصقول كون ايموت
لوزه . اشتهت ليله من البلابل
وآنه . ألم من ريكَ تين آخر الصيف
اسنين ألم
وسنين أكَطرَه
إويه الورد والهيل
وروايح فجر شمَّام
وبهوسات أجي من أول الشارع
تلاكَيني المناير
والكَبب بهلالهه العالي وذهبه
ونَشرَت إضواياتهه
وأكَعد وأنيّم الياس بعبيره الندي سبع أيام
احوطهه بقرايين ، وصواني شموع
بلكي تنام
وأحسِّب للخميس اليجي
وأنتظر وأظل محتام
يا ساعة تغيب الشمس
وانتَ اتهل
مشاعل ضوه اتدِكَ بابي
وأخاف من الحِسن
واجفل
إو وراك ايزفك البستان وايهلهل
إو وراك الفرح بمواكب ترف اعلام
وأكَِل للعصر
بيده إيجيبك العتبة غرفتي
إو واكَف آنه اكَبال المرايات
أشيلن بيدي شَدَّة الياس
ومن تكَبل
أرشك بيهه امن ابعيد
وأبوس امنين ما بَلِلَك ريكَ التين
ومَي الورد ، والشمّام
وافرفح بالبجي من الفرح يَحبيّب
وأظل ما نام
أظل أيام ساهر
وانتَ ريحانة بسريري اتنام