امي .. امي
مثل كل العراقيات
شالت ظيمها واتگبعت بينه
ولولت من قهرهه الحزن والحرمان
تترجه بزلال ايفيض وادينه
ورضت يگضي العمر عثرات
عثرات
يتوچه اعلى جرحه وياكل بطينه
واحنه من القهر .. والاخ
والبعدين
أكل بينه الدهر .. ياما اكل بينه
على اجبين امي .. شفناهه علاماته
وعلى اخدود امي
مرسومة نياشينه
شالت ظيمنه وعبرت لذاك الصوب
تتحدى الزمان وتگعد بعينه
فرشت للنوايب شمعة العشرين
ويا ذلة عمرها الفگد عشرينه
كدت واتعبت ..
لاجل اعيونه الترفات
تتحمل تعب .. والتعب سالينه
اذا مرنه شتا اجويريد
تحضنّه بحنان الناس كلها
وتجي ادفينه
واذا مرنه الفقر والجوع
تحرم روحهه من الزاد
وابسكوت تطينه
واذا مرة تعرينه ..
ولفانه العوز
تنزع من جلدها .. اهدوم تجسينه
واذا واحد ..
وگع وجعان
تاخذ من عمرهه اتضيف لسنينه
واذا واحد طلع زعلان
تذب الصوچ بيها … وتجي اتراضينه
واذا ساعه تأخرنه عليها
وفات نص الليل
تنوّم الليل كله .. وتظل تتنينه
امنه ويا طبع امنه
تبات ابلا عشه ويعبر عليها الجوع
كون الجوع ..
تنزل بالضلع يوميه سچينه
امنه الساترة الجيران
بالطعمه التوديها …
اذا گالوا توازينه
امنه التهمل الها ادموع
اذا شافت فقير اينوح
مچفيه مواعينه
امنه الطيب كله .. وعذر الحديثات
مستورة ابختها وتنگل الزينة
امنه اوسام …
شديناه بعتبة بابنه
من الحساد حامينه
امنه اوسادة التعبان
واوجاغ المضيف وتچوه اكفينه
امنه اعصابة النوماس ..
والفوطه التلم الشيب
اذا بيت الفرح مسدودة روازينه
امنه ..
دمعة كل يتيم ايبات
يم في الاقصور
بصدره امكسرة العبرات
والدمعة بوسط عينه
امنه الصابرة اعلى الظيم
متحفيه الجدم
تمشي بلهيب الصيف
اذا شمس التعب والاخ تچوينه
امنه اربات هاي الگاع
ربتنا يتامه وصرنه خوش ازلام
بس بالخير من ينجاب طارينه