لا ترجع بعد اوروح الله وياك
توهه جروحي هادت لاتكعدهن
تعناك الكلب حزنان بيه الشوك
ودموعي شبكنك ليش تطردهن ؟
تاه الراي بيك وبالعمه انصابيت
وعاشرتك سراب وعفت واحتهن
صار الحزن ثوبي والدمع سلواي
وعيون الشماته رماح نظرتهن
انتظرك زرع ومراشنة فلاح
تاليهه تكلي ماي ما الهن
شسوي للزمان الاخذ مني الزين
وخلاني اشوف البومه خشفتهن
ما ظل بالحدايق ورد نشتم بيها
بس ريحة فراك وناي ساكمهن
انه كلبي جبير وبالوفة معروف
مثل موكد مضيف دلالي حاضنهن
كل عمري قصيدة وعاشك الصفنات
ودموعي قوافي بفشله حاسبهن
وك نومي خفيف احلامي مستحيات
اخاف من الذيابه بغفلة تغدرهن
انه عمري كضيته صواب فوك صواب
وجروحي قديمة شيبي ساترهن
انه هدومي عتيكه وادري موزينات
بس عندي كلب بردان لابسهن
انه بكلبي مدارس خرجت عشاك
وفراكك كتلني وذبح خاطرهن