سلام الحب على أحلى الاسامي.
گبرك وين حتى أبعث سلامي؟
گبره إبين الورود
وبكل گلب موجود
موجود .. موجود.. موجود
الى گبرك تريد تحِّج النجوم
وابابَّه الشموس تصَّلي وتصوم
بشباط الطيور اتدور وتحوم
ماتلگاك.. وترد بگلب دامي
گبرك وين حتى ابعث سلامي؟
گبره أبين الورود
وبكل گلب موجود
موجود .. موجود.. موجود
يبو جسم النحيل الضاوي شمعة
ويبو وجه الجميل المملي روعة
ماشفنه الحزب وگعله دمعة
الاَّ بموتتك يلمتت ضامي
گبرك وين حتى ابعث سلامي؟
گبره إبين الورود
وبكل گلب موجود
موجود .. موجود.. موجود
لو قصر النهاية يسولف اشلونك
تضحك والصَّياخ مزرفة أعيونك
تلگيت المنايا وماخطف لونك
خافوا.. ماخفت يازهوة ايامي
گبرك وين حتى أبعث سلامي؟
گبره إبين الورود
وبكل گلب موجود
موجود .. موجود.. موجود
سلام وياسلام الجبل دونك
أكبر من بحر.. بيمن يوصفونك
على أسرار الحزب صكّيتها اسنونك
هلا بك يا تچيتي ومصدر الهامي
گبرك وين حتى أبعث سلامي؟
گبره إبين الورود
وبكل گلب موجود
موجود .. موجود.. موجود
