رحيم المالكي

لاتلوم العين وتنشف الدموع
أشضارك لو دمع صبت عيني
لو تعرف أسباب نوحي وليش أنوح
جا صرت عبرة وتجي أتبجيني
أنته ماعندك جرح تبجي عليه
أوين تلكه حسين مثل حسيني
كون مثل حسين عندك دلني بيه
وين هذا حسينكم دليني
لكن أنت أمنيلك ومنين أجاك
أبيا هو منهم تكدر اتباريني
حسين من دمه وضع للدين أساس
وحاولت ربعك تهدم ديني
وهيه لو ما كربله اوكفت حسين
أنه مدري اليا شمر تهديني
أنا مو بيدي أذا أذكر حسين
هيه تركض للصدر جفيني
حسين ثار الله ومحمد وصى بيه
وعن وصيته النبي مايعفيني
أحسين ثاره وحاشا ينسى ثار
وعن قريب الصوت اله يناديني
تري تلهيني واكلك مستحيل
حسين ثاري وعنه ماتلهيني
ممكن تهدمني بس يبقى الأساس
شما يمر عاشور هم يبنيني
الف وتلثميت عام وانه هاذ
وعجزت سيوف الظلم تثنيني
أشكثر جم حجاج مرو بالزمان
وحاولت كبلك دول تمحيني
أنه سجت شرف وجروحي كزاز
ياجدم حافي الكدر يمشيني