رائد الفريجي

حزمت كل جاهل
بروحي حلم
برموشه شيب
يكطع بجنح الفراشه
شجم حبل بي روح مدفع
ويبني لطفال النوارس
فوك كل ساتر جرف
حتى كل شيله ابتسامه
بظهر ابنه تودي لخدود العراق
وتفتخر بالماي ايه
والطلع بوسات اطشله
الماي شعيلي باليروح
وما اريد المغربيه
مفرعه بيهه الامهات
ونوح متروسه السطوح
الشهكه ريح
تمر على اوراق العمر
الرحمه بيك اتمنه احسه
ما اريد اتواعد وياه بكبر
شوف جم جنه رسمتك
فوك شفة انفجار
ولبست كل طعنه
من عندك عذر
شبيك ياصاحب
بخت كف مستحاك
لنار من اخيام زينب مستحت
تريد تكسر عينهه بولدك شجاك
كافي دوم ابير اخوتك
تبقى يوسف
وتنسه جم يعقوب
ظل ينحب وراك كوم لم جتفك اليعبرون خصلو

بروحي جم خطوت حلم
حلمانه تمشي
ومن لكتلك فوك
كل شارع هو مكطوع نفسك
طبت بسابع حلم
الماي شح بعين دجله
وكاع غصت بالزلم
حمره عين الغيم صارت
من كثر دخان بيتك
وتدري من ضاعن سنينك
ياوطن بعيوني ابد ما دوريتك
صدك اذكر
بس فتحت اعيون اذاني
بحلك كل شامت لكيتك
ياعراق البير ماضم
يوسف وياهل الكهف
لا تامنه بير سرك
انه اعرفه البير
مو مثل الظرف
ياعراق التفت بلكي
تشوف ليلك
نايم بحضن الفجر
وتنده شجم صفنه ترسم
عين ضحكتهه بصبر
بيك حتى الليل
أحس أيده طويلة
ايبوك ساعات العصر
زحمة بعيون
الشمس فانوس تشعل
شوف جم
حنه أعله جف عريس تسال
الشيب غيره
وكام ذب روحه حجاب
برأس كل أم
فرعت يم كبر ابنهه
ألجنه ليش بسد
جهنم بيك تختل
الـــبـــلابــــل
ما تعرف أتشيل سبحه
شلون تعزف طور داخل
والله زحمه شلون
من عين الفجر فيروز تنزل
عركت وجوه النوارس
من لكت بحضان دجلة
تبات جثة
أنت ياسر الحياة شلون تكتـل