ناظم الحاشي
ذوله اهل البيت ياماي الفرات
جوك عطشانين دكوا بوبك
العطش خله احسين يتعنه ويجيك
بحر يطلب ماي من احبوبك
ماعرك مايك خجل من شفته اجاك
وجان يتصور تشيلها هدوبك
طاع موسى النيل قبلك يافرات
وجان قاسي اويه الحسن اسلوبك
كون مايك يغسل ذنوب العباد
بيش تغسل مايك من اذنوبك
بدل اسمك كوم يانهر الفرات
وحته اسمك بعد مالايك عليك
لان يمك مات عطشان الحسين
وطاسه صارت لال امية اجفوف اديك
انت لو تخجل صدك جان انجفيت
وجان بعد حسين مايك ماجره
شربت اخيول العده منك زلال
وعطش عبدالله وشرب من منحره
اشرب الكوثر هنيئا ياحسين
وانت من دمك رضع دينك ضوه
والضمير العطشك يلهث وراك
شرب كل ماي الفرات وماروه
