رحيم المالكي

شلون تجري ومايك ازرك يا فرات
وانت ذنبك مو ذنب يفطر سمه
تسابقت بالطف على حسين السيوف
ومايك اول سهم في صدرة انرمه
وجان مايك احد من كل السيوف
اثر على حسين حيل والمّه
السيوف اعتنت تطلب دم حسين
وهاي حاسبهه الحسين بمقدمه
بس بنات المصطفى حرا الجبود
حسين حر وهاي للحر تلجمه
وعطش عبد الله التفرفح بين ايديه
وكطع كماطه ولعد مايك ومه
هاي بس وحدهه صارت كربلاء
عالحسين وكربلا من الشرذمة
عطشيت الدين عن بكرة ابيه
وكطعيت جفوف راعي الموزمة
تدري لو مايك وصل يم الخيام
جا روا العباس منهم صارمه
وجان ما ردت رؤوس على الرقاب
وجان ردت خيلهم تكطر دمه
لكن انت تريد تذنب يا فرات
وهاي ما تحتاج شرح وترجمة
طاعت اسماعيل صحراء الحجاز
وانت شح مايك لابن حامي الحمه
ذاك ابن واحد سال ربه الجليل
كيف تحي الموتى وترد قائمه
وهذا ابن حيدر علي سيف الرسول
الما يهاب بدينه لومة لائمة
الكال لو ينكشف عن عيني الغطاء
ما يزيد من اليقين الفاهمه
وتجري بعدك يا فرات
الما يشوف الحق عسى بعينه العمه
كوم طم روحك حدر قبر الحسين
واعتذر لله واطلب مرحمة
كوم واغسل مايك برمل الحسين
وخلي مايك يا نهر يتيممه
وشوف فرق البينك وبين الكرام
حسين شاف الدين عطشان الدمه
ضحى باخر قطرة من دمه الشريف
وظلت اخر قطرة ثورة وقائمة
حسين نبع الجود وانت اسمك نهر
ويا نهر للمنبع انطة وكرمّه
حسين صافي واصفى من نبع الجنان
وانت مايك طين وجروفك طمه
حسين لو منك شرب انت ارتويت
وجا تشرف مايك يلامس فمه
لكن انت الحظ عماك وتيهيت
وسوءحظك رادلك هالخاتمة
وسوء حظك رادلك هالخاتمة