احمد خماس
يا غصن البــرد نــام اعلى متنــك كَيظ
ورياح عقول ظلمة اعلـى الطفـل تصغر
سجـة جنـة خطـوة وروحـي فزعة ريل
تـره الدنيــا نهـر وحسينهـــا المعبـر
قريتك بسملة لكل سيف شانـه اصــلاح
وعلى سور السجن شفتـك شعار اخضر
تهــد بطيفـي واهس واستلـذ بــالمـوت
من اصحـى احشــم السيــف للـمنحـر
راحة بـــال من الطـم واصيح حسيـــن
وعلى كلمن يضدني وجـوب كمت انغــر
انا ماشي بدرب كـل نكَلة عثـرة مـــوت
جـم هـودج منيـة بــراسـي مــا يعثـر
رويت عنـادي جرعــة واهـس من سنين
من جـربة سما اللـه و مـايـها الكـــوثر
يا كـلب الـحى بــارد بيـاضــك هيــل
يـجيــرانـك كَـمر مـالاكَ بيــك الــحـر
تتـشـلبـه عليــك الغبـة يــاس ونــور
من شافـت شمــع وبخــور يمــك مـر
يا مـعنى السمـح يـا ترف طخـة ريــش
يبـريسم طــراوة مــاي ضــد كــل شر
و يـا شـدة ورد واتـشـظت بـنـعـنــاع
يـا ريـحان مـن وجهك ضــوة مـطشـر
الــماشافك يحـس الــدنيا طيــحت ليل
يلــم روحه بغشـــاوة وصــاح ما اكَدر
يلـجمــونـي اذا كَـالولــي عبـــر هــاي
مــاترهـــم واشــوه كَلبــي لــون اسمر
البــروحـــه جـرح يــفتهـم ملـح الناس
بالهوســة ويـــميز حجــايــة الــخنجر
يظل فاهي الحزن لو شلت منه حسيـن
الكفر شي عادي اذا مو ختمي من حيدر
