سيف الحلفي

سفينة نوح رادت تنصر حسين
عرضت بالبحر متحزمه بماي
مشت،نيتها للطف عثرت بروج
كرصها شراعها..وكالت علي وياي
تقريبا مشت شط،،وجربتين
بحساب العرب.. من الله ليجاي
ب علي وبيا علي وصلت للطفوف
وكفت عالفرات متيهه الراي
تصعد فارغه؟ ماتروي الحسين
تترس روحها تغرك من الماي
صاحت عالشمر والجيش الوياه
مثلكم انه حرمه تنازلوا وياي
انه مو بت ابوي..ومو ظهر نوح
اذا مو خيل اميه اسحكها جواي
كامت تندعي الله،ورفعت شراع
ربي بداعتك سهللي بس هاي
ربي اكلبني جربه بجتف عباس
انه محرومه..اريد اشبع من الماي
سفينه انه وشلت من كل شكل نوع
ماتعبني حمل الدنيا فوكاي
بس لو ردت اشيلن حسرة حسين
بعد مية سفينه احتاج وياي
وحجت ويه النخل بعتاب جتال
شنكل لأم البنين بعملتج هاي؟
لبدتي العمود الصاب عباس
عساج بفاسه كون تحولج ناي!
انه كون ادري بالطف موقف هذا
جا ماصعدت بذراتج وياي
تراب الصحره خجلان من ابو تراب
يدري بروحه يجوي اطفال حفاي
وكمت من خصري اشمر عالخيم طين
ويوصل يم خيامك ماي وفياي
جف عباس طاح وعندي مجذاف؟
السفينه البت اصل ماتقبل بهاي
كسمت من الشراع لطفلك كماط
وشلت الباقي كله لزينب فياي
وانه والله من حركوها الخيام
مااخرني عنكم خوف مولاي
ركضت بس ذكرت جسمي من الاخشاب
يعني بجيتي ازيد الحطب لعداي
ورحت خليت شاهد عالجره هناك
بسهم فوك النهر خطيت ذكراي
لون الشط..زراكه آثار السياط
مو لون السمه وصار ازرك الماي