يحيى العلاق
ردت اكتب فرح يوم من الايام
وجبت حنة عرس وشموع خليت
اجرجر بالقصيدة معاندة وياي
كلش تعبتني ومنهه مليت
بديت بمستهل ما مقتنع بي
وخمس ابيات بيت يقشمر ابيت
ومكيف ميش اقراها للناس
كبل ما اقره كلمة بعيني صديت
اباوع بالملامح ميتة الافراح
وياعاقل يطش عالموته جكليت
المنصة مراي تعكس حال جمهور
واليغلط يصب النار عالزيت
شفت جمهوري وجهه مغيم دموع
صرت دمعة وعلى خدوده تبديت
انا شاعر حزن مختص بالهموم
ومن هاي الهموم محصل الصيت
اعجبك من اريد اتناول الموت
اخلي المفردة تنكط توابيت
واخلي البيت نفسه يهزه معنا
يشك زيجه اعلى روحه ويطلطم البيت
ويهتفلي الدمع من اقره عالضيم
وتصفكلي الجكاير والبواكيت
كبل شعري ترف بس وي كبل راح
وجنت اكتب غزل تاليهه كفيت
وتبت مابعد اصيرن روميو انوب
لان برخص ثمن باعتني جوليت
