حمزه الحلفي
شكد صار انته حلو
يمكن كبل متصير
ويمكن كبل هل وكت
من جان نوح صغير
نكعك رب العرش
وي يوسف بفد بير
شفاف عندك رطب
وضحكتك ضحكت طير
خصرك رشاقه حبل
والشاف طولك داخ
بتهوفن كتب صوتك وشارك باخ
شجم اوف مني خذت
وحصره ومسبه واخ
مثلك اريدن الي يسوولي استنساخ
مشمش عسل مستوي
محرم على شفافي
الثلج يمطر برد
وانته مطر دافي
بسنونك الكه الصبح
متوسد وغافي
دمعك ولا كل نده
مثل النده الصافي
عونه اليضوكك ولو
ضوكتك ورطه وشكر
زيجك محطة بجي
وخسفة خدودك نهر
فراكك قهر عل كلب
وشوفتك اكبر قهر
طفيني جاي احترك
معقوله كلبك صخر
هم عود عندك عين
ونسوان عدها اعيون
جف الكمر كحلك
ومن نوره حطلك لون
من تنعوج شفتك
ينعوج كل الكون
ادري انته مو حصتي
وياك تالي شلون
عونه الحضن همستك
صغيرون الوليلك
وقره مقاطع شعر
مناوب وغنيلك
ايمان كعبة شرف
محتاج اصليلك
وارجع اطوف الشعر
واغفه بحضن ليلك
النسوان من تغتسل
تغسل ذنبها الجان
والماي بيك اغتسل
من غلطت النسوان
من تمشي طيبه وعطر
تمطر ورد نديان
مو خان بينه الصبر
وصعبه الصبر لو خان
