باسم البديري
مأذنة والله اكبر
صوت دك بكل ضمير
وبلبل يناغيله فختايه حزينة
وحنطة تتشلبه على ركبة شعير!
والسمة تمغطت باخر غيمة بوسة!
جان بيهه النده شاهد!
وجه مفعم بالحياة
وبالمقابل………وجه ثاني
ذنوب مليانة الشوارع..للنخاع
وميت الف قربان صاعد!
واني وسط همومي يصعد بيه موت!
والتفت الكه الشوارع..بيهه موت!
والتفت والكه الضماير..راضعه من صدور موت!
وبين ضوضاء الذنوب..بكهف مبني من يقين
بصدري ينسج عنكبوت!!
واجت لحظة صحوة..منظر طفل
شفت وسادته احضان الجرايد
واني يونس بيه يصرخ
بس احس الناس …كل الناس حوت!!
ستوني كمت بروحي احسن بيها روح
من بدة يحرك اصنام احساسي صوت!
وراح اشك بأنتمائي
حتى اثبت وطنيتي
بعينه حررني ولكيت الجرأة مرسه
وكل ضياعي وحيرتي…انرسمت وجود…بسد هويتي!
روج ياخذني غريق
وروج ياخذني لشواطي الامل…. بس ارجع عطش مليانة ريتي!!
حتى اوفي جروحه كلها…البايته وياه عالجرايد
كلت اشيل احساس امي…احساسي مايكفي لقضيتي!!
هايشارع….كوم حاجيني اعله حيلك…ذنبك انته؟؟؟!
لو ذنب ذيب لحمامه؟؟…وسوسلها وانته شفته؟؟!
لو ذنب عصفور بالعش…ركطه اجته؟!
يافراشة..
شلون خليتي كحل جنحج يفيض
فوك اجفان الرذيلة!
وانتي تدرين الشرف لو راح
توكع سارية..
وعكال ماتدناله شيلة!
منين ما اكلبهه اشوف الطفل غلطة!
منو بيكم…شال همه؟؟
منو بيكم…يكدر يسد الفراغ
ويشبك احساسه ويصبره
لو نطق..ويريد امه؟؟
شما كبر باجر يعاين
يلكه اكبر جرح ابوه…ويلكه اكبر غلطة امه
………………………………………….. ..
واصفن بس ارد ياخذني فكري بعيد…ولهات همومي بيها كمت احس غصه
باجر لو كبر من يقرة بالقران………………..اببر الوالدين شلون يتوصه؟!
