تقى صبيح فاخر
هاي زينب بيها هيبة حيدره
هاي شمس الله ألبقت بين السحب
هاي كمرة الضوت بنجم الظلام
وبوجه عدوانها تمطر غضب
هاي اخت عباس يعني بلا نقاش
من تشيل ايدينها تدنك الركب
زينب العجنت تراب الطف تريد
تغطي بيها وجوه خافت تنسلب
موخدرها الينسلب لا مستحيل
عن علوم الغيب تنشال العجب ؟
ولا اجد ما اقنع بزينب تصيح
وعالذبيح الراس تمليه بترب
هيه بس راحت تودعه بكل وقار
كالت القربان يارب استجب
غير لو صاحت أظن ما يبقى جيش
ولا سبيها يصير لرجال الغرب
لون تصرخ زينب تكوم الطفوف
البطل من اهل الرجس تلكاه هرب
يا قصر هذا اليهزها ويا يزيد ؟
بكلمه منها الكون رايد ينتصب
زينب اللي اتكثرت بيه الكلام
الدواهي تصيح دارت ياعجب
الصدر موجر يا يزيد الكيد كيد
وأسعى سعيك حيل والجهد انتصب
احنا اهل البيت خلدنا الزمان
وابد ما تمحي ذكرنا من الكتب
ومن افكر بالعقيلة شكد احير
والتناقض يتضح واوكع مطب !!
رقة للايتام بلسم للعليل
ويم عدوها تصير نيران وتشب
تنسبي للشام بأطفال ونساء
وبيها هيبة كافل الما تنسلب
