زمن الحركاني

اليسال منو زينب خله يسال
واذا مامفتهمهه يفتهم راح
بأثر خطواتهه لوحضره لوماي
والدوست جدمهه الكاع ترتاح
ولتشبه عطر زينب بالاورود
بدخان الخيم شمينه قداح
كلشي بصفهه يثبت حته الادموع
الترجف بالجفن تتحول اسلاح
تتراجف اغصان الشجر بالريح
وتكسر جم غصن لو صارت ارماح
بياض الكلب ستري بغيرهه يزول
دسمع حته تفهم واحنه نرتاح
اليغرك بالعشك صدكني مستور
بس الدمع ينزع ثوبه اذا طاح
كبل المطر اسود وجه الاغيوم
ويصير ابيض وجه صدكني اذا ناح
كلهه ايتام تبجي ابابهه اتصيح
لان بالطف تعودت تسمع اصياح
زينب فوك بس مومثل الاطيور
وفرق ظل العشك عن ظل الاجناح
بظل العشك تغفه عيونه تنام
بس الجنح ياخذ ظله اذا راح
كل دمعه بعيونج بيهه تذكار
وهنياله البجفه الدمع ينزاح
مرات الحلم يوكع بالادموع
وبس دمعت عيونج ترهم سلاح