جبار رشيد

اني ونظر عينك
اثنين جانو الك …ماكو ابحياتك فقط
اني ونظر عينك
وعينك درتهه ورحت …ولا جني منك جنت
وبكل سهولة اخسرت
واحد من اثنينك
ومن رحت طاح الكلب …وصحيته كوه وكعد
وبأول احجاية انحجت
عنك سأل وينك؟!
ظنيت ساعة زعل …وخلصن ايام اشكثر
ساعة زعل ما كضت
يا زين من زينك
جم طيف الك ودعت
حملته شوك وعتب
وزتيته اجه لعينك!!
وكل هذا باقي ابأمل
لازم يجيبك تعب
ذيج السنين المضت
ما بينه أو بينك
وما أيست ما تجي…بس اني لازم اجي
ابحجة ارد دينك
شديت عين الجرح…جبته واجيت اعتذر
يم باب سجينك
طميت مجرة الدمع …لونت وحه الحزن
ورسمت سلة ورد
ماريد منك فقط
بس مدلي جفينك
جيت وجبتلك ضحك …وبوسات طفلة وطفل
شايلهن اشفتي
وخدك العيد وفرح
بالك تفشل طفل
لو باس خدينك
وبالك تكلي انتظر
بعدين افكر واجي
لا اله هسه تجي
والغيهه بعدينك
ارجع واخذ ما ردت
واصرف اسنين العمر
وشتريد بيهه اشتري
وخليهه كلهه علي
لا تصرف اسنينك