قاسم شنيشل
غشيم وكلبي ظن وبالاظن خليت
اصغر جرح بيه بحر حزني يفوج
من ناحيتي شايل بس هجر وفراك
وعكس شايلك انه ونار كلبي تلوج
شلت طيبة كلب ما شالهه العصفور
مامر بالورد خاف الفراش يضوج
عش باني بعشرتي وياك فوك اغصان
حبي وفوك عشي دكعد الغربان
اوديلك اطيوفي يرجعن مدنكات
استحن لمن لكنك بيه ما حلمان
طولت بغيابك متت حتى تعود
اجيت وجفن شايل والجفن شمتان
رغم غدرك وبعد كام شكي يزيد
وخاف اشرك بشكي ويغضب الرحمن
ليش انه اعله بعدك صرت ريشه بريح
يعني انسان انه وانت مو انسان
ذايب وانت ذايب صح ولكن
انه بنار ذايب وانت بين احضان
شماتي الخذوك بطرك واهس ليل
وضميرك امنيته بمسك العميان
ضحكة واهسك نصيهه تالي الليل
زحمه بنص عزا يطلع ضحك نسوان
يالسود كلب بسك تحجي عالحب عيب
لمن تحجي كل اسوالفك دخان
سد حلكك وعينك فكهه حتى اتشوف
منو الشكله ملاك وداخله الشيطان
فشلتي وياك كبرت بيهه بين شيب
لتمثلي دور العاشق الولهان
حتى بصورتك وجهك مثل مكفاك
وطيفك من يمرني يمر نفس غركان
سألو ردت شبهك بس كلت لا عيب
اشبهك خاف وردة ويخجل البستان
رحت يم الشماته بظرف رمشت عين
وملحك عالجرح يمشي بجدم تعبان
يالكلشي عكس سويته من امشيت
اجنازه بعيني صارت زفة العرسان
العسل ما مشتهي من فركتك لليوم
مو متعافي بس من القهر شبعان
امس ظلك نخيته ومر علي بالليل
اجه مدنك خيالك مستحي وخجلان
شكد سولف عليك وعينه تنكط عيب
دفو جسمك توزع لليجي بردان
