عادل السعيدي
روحي مشتهيه بجي ادور مكان
حتى لاتمر ناس ويسكتونهه
اتريد ويه الدمعه يوكع جف تراب
حتى عيني اطيح من عيونهه
عيني مشهوره بغيابك هسه حيل
للفواتح كامو ايطلبونهه
الدمع بي صوت مزعج من مشيت
الموته من ابجيلك ايسمعونهه
ملونات ادموعي اطشرهن عليك
بلون عينك حتى لايقلدونهه
والشماته بلا خجل تركض وراي
كبال عيني صورك ايحطونهه
مومحبه لخاطري ايذكروني بيك
لا وحقك هم يتقصدونهه
عندي نوع من البجي ايخوف عليك
ولهذا المسأله ايفعلونهه
فد مبذر بالدمع من احجي بيك
سنين عمري اطيح ويلمونهه
لمن ابجي اطيح من عيوني ناس
تركض لخطواتك ايدورونهه
تنشطر دمعاتي تخلق جوء كئيب
لو سوالف عنك ايذكرونهه
تختلف دمعاتي لا من نوع خاص
الفاكدين اعزاز يتمنونهه
