أبونه انطاك عمره حضرة المسـؤؤل
وقبلها انطاك صوته نصرتا للدين
وهسه احنا اليتامه وحيل طكنه العـوز
ابكثر ما طكك التبريد جوعــانين
ابونه انطاك صوت اتجازي ولده بصـوت
… … اخجل يا شمر وانزع قناع حســـين
ابن جيراني مــل وعزل الدكـان
وعلى وجهه كتب لا ديـــن لا بعدين
ردت كرصة خبز تنطيني كرصـت ذان
جفك ليش طكنه انريد جـــف طحين
مثل كلب امي شوف هدومي مشكوكات
وبعد كلشي اخسرت ما خاف رفة عيــــن
تعثــرك وكفتي ابهذا التقاطع كون
ولا تغلط علي عمي احنه مو وصخــين
المشك من الشمس والسمرة لون الجوع
جنه بزود ابونه وداعـــتك حلوين
تره الثوب العلي هذا التشـوفه اجبير
انه اتذكر علي ضيك قبل ســـنتين
الفرق كلش بسيط انقيســه بلسنتيم
بين المرتضى والعدنه مســؤولين
علي يطبع اصابع وانتم اطبعـــون
علي فوك الرؤوس وانتو علخــدين
وعلي يصعد مهرته اتشــوفه كل الناس
مهرة امظللة ما عنده ابو الحســنين