سلوان المحمداوي

امجتف للمشو ياليل …
امن اشهك نفس كمت افحط
وعليه استفحلت جم زين
.. جم بخير
خلن واهسي امحنط
الشاعر ليش من يعيش ذكره يموت
ومن يموت عدنه يعيش
الشاعر كون وسط الروح مو وسط الكبر ينحط
ومو يرثونه بعض الجانو يخلون
زيناته اعله خد الشط
يليل .. وحزني ما مرتاح
يسهر رحم ال.. مني اشظال
صار هواي غاب هواي
رغم ماعفته يبعد قط
جان وياي 10 سنين مازعلان
شلون رسوم وجهه تصير مصدر رزق للدفان
مشه وخله بكايا الروح
تتناثر هوه ابدخان
احاجي بصورته اشماضوج
واصرخ آخ
يثلمتنه الجبيره .. منين اجيب اغطاك
انه ادرييك نمت بردان
افز من صحوتي لطرواك
اغطي ابذكرك واعرف
شهكتك عالكبر نيشان
ترضه ارثيك …
وتصير اسوالفك بذني
درب بي يلتقي الهذيان
ترضه ابجيك وانت وياي
ذكره ابذمت النسيان
يل مفرهد ضحكنه الصفنه دكت باب
يل بكلهن صدك بس موتك الجذاب
رد وإكتل مذلت انسان
ردت تزرع كصص حته المذله تطيح
ماطاحن بهجرك خضرن بستان
كون اتسودن بفركاك
حته ابكيفي ادك بيبان
ابعدت والكلب ذل فراك بي بان
كشمس وشوكي الك يهواي بي بان
وضحكتك كمت ادك بجفاك بيبان
عسه اشتم ريحة العرفك بيه
وأكله الجذب لتصدكه
واكله وداعتك صاير
ادك رجلي … واظل بعازة الخنكه
واجه هسه وكت ونزوره من بعيد
ودلتنه بابياته احرورت الصفكه