لفتة الباني

مدرى انه الخرب طبعى…
مدرى طبعك من ثكل همك خرب
ما عرفتك…..
وجهك اصفر….
ذبل عودك….
ثوبك اسود…
حتى فوك اترابك اثار التعب
جان بيك الليل للسمار ونسه..
وطور حياوى الطرب
وجان بيك النخل للتعبان يومى…
وابشليله ايذب رطب
هسه شفت النخل يابس…
يشرب الدخان وايظل بس كرب
جنت اسولف وى روحى…
وكلت بحر النفط من يطفح ذهب
شو لكيت الدمع بعيونك سواجى…
وتشره اعله البين
وادور عتب
كلى كلى…
كلى ياهو الجان ينطر فرهد اسلال العنب
وكلى ياهو الجان لازم سورك….
ايبدل السنبل بالكصب
اعذرنى كلش ما عرفتك يا عراق
هذا جرثوم السياسة الحاد بين بالشعب
هاى الك كل الاطفال التايهة ابنص الشوارع…
ترجف ابليل الغضب
هاى الك كل الارامل طايحة وتستجدى من فضل العرب
هاى الايتام الجثيرة امنين اجت…
واتيتمت شنهو السبب
اعذرنى كلش ما عرفتك
حتى هدمك من على امتونك تعرض للسلب