عباس السلطاني

غسلت ايدي بنهر عاگول
من شفت الورد بگماط ..
يتربه بحضن هيمه
ابدوي واتنفسك خيمه …
تره رمح الشمس چتّال
من ايطيحله بغيمه…
سيف غروب تذبحلك شمس من آب
وتيتّم تمر فحطان
لملمني يگذلة نار مشطني الخفت دخان. …
افركني فرك مصباح ازخلك خير
بيّه المارد امعزّب….
اچهبني بعذر خابط اگطرلك سوالف حب….
تره ابدونك عشت سكران
واتستر بريحة هيل
البريته حمد زافوف يشم كل ساعه عرس الريل. …
الينده غبشه صوت الديچ
الشمس چتالها الشباچ
يروحي اشچم رمح مر بيچ….
يالبگصتك ركض رعيان من شبگوك
ماتعرگ سوالف ريف. …
اليهمش خبزة الجوعان
چن كاسرله ظهر ارغيف. …
ابكل خطوة عجاف البيك
امدلك درب يوزرسيف. …
الشايب حيله عوچيّه…
اجيتك شيخ افرفج عوز يم ديوان
ماكو بظهره خاچيّه…
البطنج للخرابه انگاد
لأن چتّال للحيّه…
من يصهل مطر عالگاع هذا اينگده چف الدين
المطر يحچي بشرط لازم ايدغدغ غيم
دورني بضريح ازلوف الكحيله
اظن تلگاني زاير شيب. .
دورني الخجل بياش چن كفره بحلگ سيّد
يگف عالتربه وگفة عيب. ..
الوجه ذله ايتكسر يبقه ينزف شوف
من تتكسر امرايه. …
دورني ولو لطّام تلگه ابعيني ملايّه…
السهر بيّه ايتكبر گام
مايسمع سوالف ليل
يالموشلني سفرة ماي
يشرب حيلها الغربيل. …
ماي ورمل خل نلتم
خلگ اتراب شلت وياك من انداس ما اهتم. ..
انا ابوجهي التعب يفرش تجاعيده فجايج طين. ..
ماتلگاني وجهي اشراع
يالملگاك بيّه اوداع. ..
الشمس والليل فرّت گاع
ماينطيك وجهه الماي لو سافر
يشيل اوياه اگياشه امتاع. ..
تره حچي الجمر نفخه..
يالزخيت روحك ماي
تكسر خاطر الفلاح من اضيفلك صبخه. ..
دفعت الغيم وخر غاد
دعاء امسافر بأخلاق
ايريد ايفوت يم الله. ..
دفعت الغيم بحرورة گلب متلبّسه الشيطان
بلچي ويعثر اسم الله. ..
رجلين الجنازه اچتاف..
من تثگل تخف اهواي
انه شايل خلگ بالموس اشگگ ماي. …
يشبخه وباگها اللهفان
انه امحضر چفن ومغيسل ومسحاه
فزعه ارجعلي لو ..دفان