سيف وليد
امسامحك صدكني بس كون تعود
هجرك كتلني ووادم اهواي شهود
باقي بطرك نفسين وكواي جروح
امفرفح الملكاك حضني المكرود
امناطرك والدمعه حركت جيلين
جن والدة جندي ودرت بي مفكود
انه فركتك ورده محتاجك ماي
ذبلن ملامح وجهي بطل بس عود
ثق اعشكك لمن جنت طين وماي
ما انسه حبك لو اكل بيه الدود
ليل ونهار ادعيله ماشايف ناس
نذر بنذر كاضيه وي شد عكود
اشهك صورك وابتسم وانسه الفات
وازرع ضحك بشفافي الصارن سود
صوت الجرح مبحوح يصرخ بس عاد
بطل فركتك كافي طيحت ازنود
فزعتله روحي مجلبه بجف رجليه
وعيوني تصرخ والله عشكك محسود
استورحك لو تمر من يم وردات
عطرك يفوح احساس ماضن موجود
ثق مانسيتك اي وحك النجمات
ثق مانسيت اعليك متعود دوم
اسكر يمر طاريك واتراجف شوك
مر بيه غلطه اشبيك قابل معصوم
افرح لون مريت وافرشلك جيل
يحزن اذا ماجيت كلبي الملجوم
مامش ضحك بجفاك ملجأ ايتام
بس النحيب اتسمعه جرح اويه هموم
جرحي وفركته انقاسن بنفس الطول
الملكه وضحكتي الماشفتهن فد يوم
اي روحي صبخه بفركتك والمطلوب
ترجعلي تمطر ملكه داوي المهضوم
الورده تستاحش لون مر عاكول
اي روحي تستاحش لون مر شامت
لون الحزن بجفاك اي كلش طوخ
لون الفرح بجفاك كلش باهت
