الشاعر هيثم سعدون
مثل ما منفرد بمگابل السيل
شفت بچعوب الاجبال الزيادة
صعدت لوحدي قمة معاند الموت
انتچيت وعندي صار العالي عادة
مدارس هالمواقف وامتحانات
سهل مجراهه للكله ارادة
طلعت اول عبرت اليحچي بگفاي
اثر طعناته لبظهري شهادة
عليمن يا جديد اليمشي وياي
على الحاضر يجي يدور قيادة
المناصب ما تبيض وجوه الارجال
المصخم وجه يبقى بسواده
يظل راعي البخت للعليه عنوان
يدوم وتنحني لاصله السيادة
الفخر لليحچي مو يجمعلي زلات
الفخر بالمعركة وياي اتحاده
اليظل يتعكز بفلحات الاجدود
بوكت ذريته ميحصل اشادة
وانه التاريخ اريد يسجل بهاي
علي جدي وابن عمي اعتماده
انه الجندي العراقي العنده اصرار
اليريد بدمه تتحرر بلاده
