رثاء الراحل الشهيد
علي رشم
تقى صبيح فاخر
يمه شلون تعقل ارهم بلياك ؟
كالولي بطل بس كلبي شيقنعه
يالردتك تشيل جنازتي بتابوت
ليش تعاجزت يالشلتك بتسعه ؟
عريس الشهادة وربعك يزفوك
وانه اصرخ شمكوه كلوبهم ربعه
يالعايف حبيبة مواعدة بحلقات
تزينتلك تنادي انتظر صعبة
يمه وياك حرت وحار كلبي عليك
شيبرد دليلي بصدري جم وجعه
رحت ادريك واصرخ ابني لا ميموت
كلتلهم يعيش وروحي التنعه
انه محلفه الغرف والبيت والقطاع
وسلاحه وبدلته كشخته ودرعه
واخوانه وصحبته الاهل والجيران
حبيبة كلبه ذيج العافها بسرعة
ومحلفتهم بكل يوم عشر شموع
من كلوبهم حلفولي منطلعه
وحتى الراد يحلف حلفه ما ينساك
يشيع جنازتك ذكراك شيشيعه
يالتارك بسمته وطيبته واحساس
اظن جنح الفراش استوحى من طبعه
ويالعايف قصايد دفتر واقلام
جلمات ومنصة مرافكة الدمعة
جامعته الكتب والقاعة والاستاذ
وكلوب اصدقائه بفكده منفجعه
هذن كلهن سوالف عوفهن وتهون
بس بيتي بوحشته شكبره وشوسعه
اسعى انه ارد ازوجك وافرح بأطفال
وبزفة شهادة رويحتك تسعه
