عطا السعيدي

يعين الله اعله العواصي امن السنين
وآنه بيه اعناد ويه العاصيات
وزه ايوازيني، وأواكح ما ألين
وارچي ضلعي اعله الرماح المشرعات
آخ ما گولن وهذا المايصير
ولا أطمعهن وابينلهن شكات
هي روحي وطنتهه اعله اللهيب
وميزة الفولاذ يصقل بالشوات
طبع گهوه اشما تعضني النار حيل
آخذ من النار محمود الصفات
 وحي ابوهه الضيم وامهه المستحيل
وهي وسنين الگحط ولدن خوات
آنه مغرم بالثگال امن الحمول
وصلب عودي وهالچتاف امعركات
اشكثر منهن حملت بس ما تعبت
ودفتي امن الجلد طلعت والعبات
وحدر هدمي وگامتي يتكسرن
والنصال اعله النصال مخالفات
واعتنيهن لو علي ما سيرن
خاف ينگال انكسر بالعاتيات
ولو أدريهن ضواري ولا اهاب
وصرت اواسدهن وألف راسي وابات
الحكمه انك تعتنيهن للمچان
لا تتانيهن يجنك صايلات
إفتر اغبارك على وجه السنين
كلهه تفنه وهن ذن الباقيات
والله اليطخ گامته ايسموه ذليل
وآنه ما أرضه تصفني ابهل صفات
مر علي كل شي وضگت حد ما رويت
خاف اكدر خاطرك بالتسميات
العسر والجوع والهم والدموع
وگصرة اليد والهدوم الباليات
آنه فلضة ضيم فرتني الأيام
ودولبتهه ومللت طاگ الرحات
وبخضم هذا الصراع اتريد أنام
يا غشيم اينام ويلذ بالسبات
خلنتي اشد اوزار وتلگه الصعاب
گبل لا يسطن عليه اموزرات
لا تكدر خاطري لو ردت احبك
وتشتكيلي من المضن والآتيات
وصرت ممن لان عاري من الثياب
وهو يا سلاب اللي يسلب عراة
وبرغم ما صار وبرغم اليصير
ما تزل اجدامنه امن الثابتات
آنه ما مجبور اصدگ ما يقال
ولا أردد ما سمعته امن الرواة
آنه مصدرهن اذ زل الحديث
وآبه بهلول اليعظل الراهبات
لأن بارم خيط وكتي بالچفوف
وبيدي سديت الغزل للمسعدات
اشلون اجفل بعد ما صار الطراد
وچنت اتانيهن وهن امحددات
ولحية الما تحشمن يوم الصياح
لا تعدهه امن اللحايا الغانمات
عيش ذيب الدنيه مو دنيا الخراف
هم شفت ذيب اچتفوه للگصاص
وداعتك بس الشياه امچتفات
وهي غابه وذيب يتسطه اعله ذيب
ويتعشه ابصاحبه گبل الغدات
يات دواليب الوكت فريني حيل
آنه ادور راحتي بالموزمات
بيه سوله السهل ما والم هواي
إلا أمد ايدي والوح العاليات