جواد الحمراني

كون يموت كلمن رايد يموت
وكون أيظل عدل بس النريده
وكون أيرد غني ومحمد أردود
ورحيم وبارق وروحه الشهيدة
وكون أنرد جهال التاتي توات
ويجينه الطنطل وصوت الرعيدة
أو..نداوم صبحي وي درس العصافير
ونقره أبشامتچ يا ست وحيدة
ونركض من نحِّل حفاي للبيت
ونشاور بعض ها….شفتوا غيده
شفتو أش..أشرت لبن ابو الدكان؟؟
حمامة سيد ورادت تصيده
ونسألها يعيِّده الشوط ياشوط
أوشنحمله الهوى عيدة ونزيده
أيييييياه أشرجع السبعين للبال
بخت ينراد للذكرى السعيدة
ياريحة مطر بخدود التراب
چن ريحة كتب ريحة جريدة
كون الموت يرضه أنواجه الموت
مثل البلسجن يوصل بريده
أشكثر أشتاق للچم مندفن غاد
لكن شوفة الميت بعيدة
أنه مفارگ بشر ماتشبه الناس
أنهجم بيتچ يروحي شگد عنيدة
صلافة البيچ ياروحي مثل ذاك
الـ..على صبعه ويسِّد الباب بيده
عليهم مابچت بس الحمامات
ولا  بس المجانين الشريدة
عليهم لأ اله الَّا الشعر چان
بعـد الله ولا عبدوا عبيده
وجه الكمر أصفر گاطع الزاد
وبچت عين الشمس گالت اريده
أنهــدم ركن الغزل ياشاطي فيروز
الصبح منهو الگدر يوصفلي جيده
عود شگد نتاني ومثلك أيصير
يمحمد بلوجوه الجديدة
ومثلك يامحمد ياهو بلناس
مشه وبس الفراشات برصيده
ومثلك يامحمد ياهو بلناس
كتب (زينب) على چفة عقيدة
دفنوا ويَّه جثتك سبع نجمات
لأن صوت الشعر دفنو عميدة
رسمنه أعله السواتر ذكرى ميتين
وشتمنه الشوش والنهضة المُبيدة
وكتبنة أعله الجماجم أغنية خوف
يغني الفاو والتعزف حديدة
مثل العيد شالع گلبه رمضان
داست عمرك الحرب “المجيدة”
كفرنه بكل حروب الخاكي والناس
تكتب عل هروبات العديدة
وأنته أتخندقت شعراً ولا يوم
طخَّت هامة الوعي المديدة
محمد چان دمعة بخد عفيفات
ويموع الماي لو خلاهه أيده
لگه الخلوه الطويلة بقصر التراب
وگعد يكتب عله ألموته الوحيدة
وچن أذني تسمعه يقره بالليل
للماتوا  قوافيه الفــريدة
ترس وجه الچفن شعر الحبيبات
وكتب نايل ترف فوگ الجِريدة
منو گلك (غنــي) ما گاله الله
ولو (كاظم خبط) ما صاح عيده
أذني أتأكدت لو شاكة أيصير
بس شاعر فحل..لا هاي أكيدة
حلاة الگال شاعر لو كتب كُون
يشلع صرة الگاع بقصيدة