مهند صاحب الربيعي
گالت خايفه وماكملت مشوار
تتلعثم بظلهه وتعرگ الچلمه
سدت بابهه وغطاهه حزن الليل
واحتر الگلب واتدثر بحلمه
ترجف مستحه وتگلي انته انسان
خطر وانه غشيمه وروحي محتشمه
ياشاعر لسانك سرگ بالي وياه
وتناثر حنيني ظنون مزدحمه
اخاف تمر علي وانچفي بحظنك غيث
انه مغيمة صبر من دنيتي الظلمه
انه بعمري السجن عايشته بالتفصيل
اذا التاف اتحمل الف تهمه
اذا اعگد ظفيره تنعگد دنياي
العاشگ لو يصدلي ينهدر دمه
چان امنيتي اكمل درس عمري الراح
وچنت حلمانه اصيرن بالطرف نجمه
عفت كتبي يتيمه بغرفة الاعراف
والزي الموحد مزگت هدمه
شتگلي حياتي دلني وين تصير
ماالهه حياة بديرتي الحرمة
شتواعدني چفك بيده كلشي يريد
وانه چفي عجز يكتب امس اسمه
احسدك عالفصاحه وحچيك الموزون
هنيالك تشوف الشمس ماتعمه
