ميثم المياحي

الليل سجه وشارع الصفنه طويل
وازدحام العافيه اعله الناس واني استجدي حيل
ونته ماكو ونته ماكو
وكاسرت اخر نفس بيه الوداعك ونتشيت ومااجيت
بس اجاني هواي منك شيب وبواهس عرس
وكلبت عمري ولكيتك
وشلكيتك
كاشخ بظهر الشماته وماكو باجر حتى اعيش
حتى من تحجي وتكلهم شوفه ذاك اي هذاك
الجنه سعفه بزودي سويته امن امس
اللهفه عيد وشوكي دك بابك يتيم
المستحى بروحي بنى الجيتك عفاف
انه بسم الله شوكي وشوك البراسك رجيم
ابعيني مايرهم وجه غير الدمع
الشته المرك مادفيت وشاعل بروحي ضلع
كاع روحك صبخه يالنديتلك نسمه بهواك
وين رايح
اطيني مهله العمر ماي ودير وجهك
هاي فرصه سنيني متبديه وراك
دير وجهك خلني انفض حيرتي وصفنت هواي
دير وجهك خل افرع نزوتي وكل مشتهاي
دير وجهك شوف شيبي شلاعب بزلفي وهواي
دير وجهك يالمشيت وفضفضت للغير دنية مستحاك
اطيني مهله اطيك شوك
اطيك طيف ابمستحه عمري الزغير
وهاك هاي احلامي بيض
استنكي منهه خوش لذه وبس الك مكتوب ضوك. اطيني مهله
ارد الم اسوالفي الحاجيهه بيك واجمع ايامي الكضن بجفاك بوك
وين رايح
بسلف مكروه طاري التفكته ابلايه فشك
وهاي ناس اتسولف بكلشي حرام وتلعن التيه وليفه ومااعشك
وين رايح
ياسمار التارس عيوني دفوه خليني بيك
اندفن بالفشله وازغر بالعكد لو غيري اشوفه ايكض ايديك
ردلي كافي
اسوالف الشمات نار
وحجي مستنكي اعله جرحي وملح تازه وكلبي حار  وخيط عشره امرورته لسه اعله باليوليله خرسه مالكت وجه الفهمهه
ولم عباته وشال من عدهه النهار