عقيل الشيباني

بدت وي الــدول ساعات الحساب
واريد اسال وجاوب عن سؤالي
بكثر ما سلمت للارصــفة ايــــتام
عزرائيل دنكلي وبجالي
مـــــنو منكم اجاني وكال شتريد
وابشر والسدى عليكم سدالي
منـــو منكم اجاني بساعة الضيج
بوكت بي حتى جتالي انتخالي
اشــــو محد وكفلي وصاح عيناك
نسائي الدين عدكم لو رجالي
عـلى مسرح ركبنه يمثل السيف
فنان واخذ مشهد خيالي
مــــشهد للــذبح وانتم كـــتبتوه
بقلم مستورد وفنه ارتجالي
مـــــــلتمين جنه وبيتنه الــــوان
سني وشيعي ما بينه اليغالي
طــب اي بيت من توصل لتكريت
مثل ما جنك اطب لعيالي
لــــتغركم اصــــوات الانــفجارات
سمفونية صارت عد جهالي
بغير اصواتهن شنسوي بالــموت
رخيص الموت واني انسان غالي
وابـــــشركم بعد ما نعرف النوم
وقعنه عقد وي الليالي
ومو بس هاي عدنه وي الهوى زماط
الما يترس خشمنه انرده خالي
العراقيين جمرة ومن تهب ريح
الجنوبي يهب اذا صاح الشمالي
احنه ارجال كلفة وما نطخ راس
الكصير البينه اعلى من الجبالي
افا ولو حرمة صاحت وين الاولاد
يطم روحه اليظن بروحه عالي
هذوله احنه الدرب يعشكنه خطوات
حوافر خيلنه اتدوس النبالي
واذا يطفى الكمر بعيون عشاك
نصعد على امتونه نشغله الي
عاين بالافق من يطلع القوس
عدل بس شافني وذل وانحنالي
ويسالني الغشيم تصيح شبيك
وعليمن يحرك اعصابك سؤالي
اذا اشوف العراق الذيب والشات
مو حكي اذا اصير انفعالي
عمر الطين ما فارك حجي الماي
ولا يكعد الماي بدون جالي
الشيعة وسنة مثل الماي والطين
القرالك طائفية هم قرالي
اشبعد يالدول عدكم من مفاهيم
لو بيكم رجل جان انبرالي
انا وادم وكفنه على الارض نوط
بزمن ماكو بشر والكون خالي
وانا براسي انبنت ذيج الحضارات
وفكرها العايش بعالم خيالي
عراقي ومن اكول اني وعلي تشوف
اوائلكم يضيعون التوالي
عراقي وشلت بذراعي انتصارات
بديه وما كلت واحد حجالي
انا السني وكت ما صار الازماط
جم شيعي الاجة ومات بدالي