احمد عاشور

بس ارد افتهم وجهك بيا نجمه
تره مليت ادورك والسمه مغيمه
واذا تعبان بس حاول تشك الغيم
دورني تره البي شوگ بي همه
دورني تره بروحي سوالف گاع
معصوبات كلمه ادّفع بكلمه
دورني واذا مابيك ظل اهناك
تلگه اهواي مثلك رفسو النعمه
تلگه اهواي مثلك مثلي تلگه منين
بشر من يختنگ تشتاگله النسمه
بشر فحطان ملگه شكثر ماشي فراگ
واضحك بس چذب بيناتنه اللچمه
تره اليضحك هواي جروح گلبه اهواي
الملح من يلبس ابيض هيچ للحشمه
مرات اشتهي غيرك واظل محتار
افرفح وبرگبتي اچلب الذمه
واحسبهه عدل والگاني ما معذور
من امد ايدي الزلف تفكيري مو يمه
صفنتي البيك تطلع من گلب وعيون
يالمخرب صلاتي من الله مو زحمه
وجهك بالسمه البالگاع بس مگفاك
شلم منك وهوه البيه شيلمه
انه مطشر بگد ما ضاملك خطوات
بس مو دوم لازم ضيمنه انگسمه
اباوع بالمرايه خدود چف فلاح
يالمنتچي العاشگ يكفر بجدمه
دورني واذا مابيك لا تنعاف
الضوه اليكشخ ابذله ايشگگه اليعمه
ولو حبيتك ومن صدگ بس الله
يعوض واليريد يروح ما الزمه
المطر مابي نقص من يمشي ينگط خير
الگاع الما اضوگه اتعاتب القسمه