رائد التيموري

طاح حايطنه علينه
وهسه محتارين من نشعل بخور
نحطه وين
عدنه غرفة شكد قديمة
جانت امي تصلي بيهه
وصارت الغرفة نبي
وعدنه حايط بي فطر كلش جبير
علكت صورة علي خاطر اضيعه
وعدنه ساعة شكد قديمة
وحته مايمشي العمر
باعاهه أبوي
أمي تنصح بينه جانت
الجيب كافر
وكرصة الخبزة شريفة ..
حته جاهلنه يصوم …..
والله جانت اختي لعابتهة طين ..
مرة طاح المي عليهه ..
لملمتهه وكشفتهه اعلى الشمس
خاطر تعيش ….
والله فقره …
نكره اليسألنه عن شكل الرغيف
وندعي كون الله يعثره ابت حرام
الفرق بين بيوتنه وبيت البلابل
بس دخن …
أثنينهن حسبة شبر
جنه نتريك فراغ …
وننتظر وكت العشه
والله يوميه عشانه
كلاص مي والله كريم
سنين بس يلم ابويه
وحته ماندري شكثر
وأمي باعت كل سوالفهه القديمة
واني بعت شكثر ماعندي قصايد
وطلع باكيت الجكاير …
أغله من فلوسنه
.. فقره كلش ..
نعزب لكلمن حرامي
وحته احنه نبوكنه
عدنه بس تربة قديمة مفطرة
من يجي الخطار نخجل
وامي تدعي ربي بس نسي صلاته
ومني احسبله الأجر…