عباس العبادي
نشدوني وكلت ما دار وجهه وراح
وفضحتني نحبتي ودمعة اعيوني
جنت منجل واحشّن بالليالي السود
بس ليلة وداعك حشّت اسنوني
جدّيتك اجداوه وذلّتي ابكل باب
بس رديت تالي ابطرك ماعوني
دكّيت العمر كحله ورسمتك عين
وضعت، لا من كحلتي ولا امن اعيوني
هجرك نار تسعر والامتون اشموع
بس حطّيت هجرك ذابن امتوني
يا كاس الزلال العطش سهمه ايجيس
تبدّيت، وتبدّت وشلة اظنوني
من حلك الخشب يطلع السان النار
وانا طاحت خشبتي ابحلك جانوني
الوادم تلتفت عن كشرة الدردان
شلون اضحك عكب ما طاحت اسنوني
يا طيف الفرح بس طبك جفني اعليك
انبكت رزّة ارموشي وهدلن اجفوني
وردتك تنتشلني امن الصراحه البيك
وترسمني خريطة مستحه ابّالك
غشيم ومن زرعتك ردت احصدك عود
طلعت ازرع ارسومك واحصد اخيالك
ابرالك خيال وصار وكتك ليل
بعد مات الخيال الجان يبرالك
نحتّك بالكّلب تمثال مدري امنين
مد ايده الزمان وباك تمثالك
يا سوط اللميض التم عليّه الغيم
بس يمطر حزن، يالفرح حسبالك
عشت اسنين مرّه ومن لكيتك عيد
طلعت شمس سوده وذبحت اهلالك
ضميتك ابعيني وبس كعدت اوياك
فكس عيني الزمان وشالني، وشالك
جنت خيمة رفاهه وعيّرتني الناس
بعد بيمن تكض من كطعوا احبالك
لا مدة بحر وانكول بلكي اتعود
ولا كعدة سمر وانعيد موّالك
صحوه، وصعب تحصل صحوة المجنون
مجنون وصحه ابهزّات زلزالك
اضحك للذبح كالوا، كلت هيهات
غلط تضحك مذلّه اكبال جتّالك
ردت بس السلال العنب ما مضمون
كالوا جيب روحك تاخذ اسلالك
كالوا جيب روحك تاخذ اسلالك
