غانم الفياض
امي .. امي سجادة صلاتي
بليل الولاية الغريبة
و امي اجمل لوحة بعيون الحبيبة
امي الولاية الوحيدة التنطي كلشي … تنطي كلشي بلا ضريبة
امي تاريخ العراق بين ايديها
امي يا طير الاشوفه يكول سلملي عليها
امي ما تعرف تعاتب و العتاب يضيع باول ضحكة من نكبل عليها
بس تموت من القهر بالعيد اذا محد يجيها
و احنه ننذب شوكـ و نعرف حزنها
مثل ما جنا كبل وكت الطفولة ننام بس نندل ثديها
و امي بأيام الحرب دمعتها ساتر
يمنه جانت عينها و نسمع بجيها
و آني اتحدى اليدور ذاكرة كل الحروب
و ما يشوف عيون ام و دمعة بيها
