عمــاد المطاريحــي

اتمنى عدنه شعب ما يقبل بموته!
واتمنى عدنه كمر ما تاكله الحوته!
اتمنى اصحه الصبح الكه عله بابي ورد
ومن امر بالسيطره..
تارس جيوبي برد!
وما اريد ساعد قوي..ولا ريد جرحك نسر
ممنوع يبجي طفل كلب الوطن ينكسر
ممنوع زينب بعد توكف بحضرة شمر
كافي دمار وقتل..موخلص حتى السدر
انريد نبني وطن..
نحتاج نبني فكر..يستوعب المطرقه
بعدين نبني جسر
(1)
يذبحني منظر طفل امزكه اثيابه
اخيالته من كصب
ويصيح نحن العرب
وسلاحه نشابه
لو راد يلعب.. (عرك)!
يرسم سواتر وهم
ويترس الكاع بجثث للخاسرين الحرب
بس همه نفس الجثث بالواقع اصحابه
(2)
يعجبني منظر طفل مرتبه اثيابه
من كثر حب الوطن -حط روحه بكتابه
اتكول جنه نبي وساجد بمحرابه
اشكد عنده طيبة نفس..ويلاه..يايابه
منزغره ابوه منتبه متعجب بآدابه
من يشتكي من العطش..
ما يشرب ويكتفي!
يشرب اللعابه!
يمشي وي ابوه للحقل
يشتل مروءة ومثل
ويترس شليله فرح ويوزع احبابه
ويرسم طيور..ومطر..
ويغسل من المطر
ويرسمله كوخ ونهر ويمددبـ(بابه)
يطلب هديته ورد لو نجح بالمدرسه
ما يطلب من الاهل
جيبولي دبابه!!