محمد خشين

شيرجعك وآنه شفتك سافرت بالكاع
وشد حيلك يكلي الشافني وماجور
يمر ليلي بغيابك ليل كلش ليل
وعله حبال العتب ما ظل حرف مشرور
أحط بيده ضلع ليدك عليه الباب
شحال انته ؟ وتدك ابكلبي دم يدور
عنيد فراكك وماعنده غيره وياي
سحكني وعافني ابكلب وضلع مفطور
عده خاصرتي منك كلشي ماكظيت
الربح منك دمعتي وخاطري المكسور
وراك امشي ردت..زافوف مو جنّاز
عفت بيه وجع ماسمع بي دكتور
أحس شالو هلي الجنّازه من شالوك
وأحس لحدي انحفر مو لحدك المحفور
بيك شكد صبح؟ والمكبره تحب ليل
زرعناك ورجعنه وخضرت عصفور
يورده وكون نعشك مزهريه يصير
أبنده الورده اتغسل موش بالكافور
اشك بروحي شايل خرزه مال فراك
اعله ناس العاشرتهه وصبّحت مهجور
عظم جتفي أنوكل كد ما مشيع ناس
مشو ماصدكت بس صدكت مجبور
يلوموني كرهت الدنيه من فركاك
النهر من ينكطع شيحرك الناعور؟
مبين من بعيد بوجهي ميت شاب
مصابك مو ملامح ترس وجهي كبور
طبيعي أذبل حزن شمعه ومصابك نار
يسألوني شجاك وجاوبت مجبور
عله الطيب كلب عالما تعوضه الناس
عله البلخير جان وكل وكت مذكور
عله الما مفتهم شنهي الحقد معناه
عله أبن المالت الله وروحه طيرت هور
ماريدن دمع لعيوني اريد عيون
الك من عيني طالح وي الدمع عاشور
انه رايد جتف ما بللنه دموع
احضنه وينجوي بدمعي العليك يفور
واكصر بالبجي بس الليالي طوال
وحشمت النجم وتعذر ومعذور
اظل ما مقتنع بموادعك للموت
ويظل الشوفتك طول العمر منذور