مهند صاحب الربيعي

شاهد عيان
ناجي
من اخر طف بالوﻻيه
شعجب ماجيت عالموعد
صدك وشعطل طيوفك
شفت حسين خبرني
بشرني بربعنه هناك
المعزبين خو ماقصروا وياكم
ساكت ليش
ياهو وياك
كال اعذرني مااسمع
لكني شفت كلشي
شفت رخص العرب من باعوا الذمه
وشفت ابن المضيف التاجر بامه
وشفت الضيف من ينباع
شفت عورة شرف الشيوخ
من تتخاوه ويه ضباع
شفت الدم مطر والشمر يضحك
والنهر متخوم
مامش جرف فارغ ظال
مامش جربة ماتارسهه دم شبان
الرصاص صفوف
سد سماي
ادعي ومايصل صوتي
طحت غطتني جثة شاب
ريحة دمه دم عريس
الحنه اختلطت بلونه
جم ساعه متت وصحيت
عزرايل يمي وسلم عليه
وكلي اركض
تره استخطيتك الليله
مشيت ودعوة امي وياي
فرشتلي الدرب شيله
ادك كل باب يرفضني
دخيل الله شجاهه الناس
وﻻواحد حمه دخيله
اهم واعثر والم الحيل
يهلبت ماي
يهلبت رحمه من سماي
يهلبت بخت باوﻻدي
يدركني تراهي الناس اختلفت حيل
ببﻻدي
وينك ياعلي ادركني
غريب ومالكيت شراع
وﻻريح التدليني
افتر والمنايا تحوم
يم روحي
اعزل والدرب ملغوم
وانه بطرك جف مبتور
وشبح يفتر ترس عيني
وينك يابوفاضل اخذني وياك تانيني
خل اشكف عمود الراس
حتى الموت يسوه هناك
اهنانه الموت بارد حيل
ومابي ابد اي داعي
اخذني صوابي جرح اخوان
ودم يابس على متوني
وجوع وعطش بمتاعي
انه لوحدي ورايدلي اي مخلوق
يعبر بيه للظفه
اشايف من حياتي سنين
ماراشف ربع لهفه
الذيابه ارحم شفتهه هواي
لو خادملي غابه اهون
اركض والعيون تصيد
وازحف والزرع مجنون
بكل وركه اشم تهديد
خاف اهل العرب يلفون
خاف اهل الكرم والخير
اذا مريتهم يجفون
انه منين ياهل الدار
العراق منين دلوني
اخاف بغير دوله مشيت
لوتيهت فهموني
كلولي العراق منين .