كريم الجسار

بس انت اللكيت الضوه البالروح
غيرك صرت ثوبه وما لكاني
عطش دربي وشفت موحانهه يموح
بخل جاري الوفه وبارح سكاني
ذاك انه وتفوت سنيني وتروح
واحسب لاهي بيهن عن زماني
كلهن عالصبر ذارعهن طروح
واتاعيله غنه وهلبت يتاني
لكه بروحي الحزن بسمار باللوح
نزع روحه الصبر منى وجفاني
صفيت بطرك عودي وحملي مطروح
اديه التهن واليكدر ولاني
وليت طالب ومطلوبه مجروح
لوي السنبل حدر منجل لواني
وليل اصلبله جفني ويظل مشبوح
واعيله على حيلي وما خطاني
عفه اليتونس برفسة المذبوح
ولا مره عبرني وما جواني
اصيحن شرد اصيح الليل مفظوح
خنكني امكابري وبالسكته اعاني
لا اعرف اشتكي وباسراري ما ابوح
واموتهن تحت عكدة الساني
ولو فاح الصبر تحت الغطه يفوح
وبالظلمه اذا دمعي اشتهاني
يوكتي البيك كل مذموم ممدوح
يالعندك زمان الهم ثواني
تهت عن داري تيهت طيرة الدوح
تسلومة شمس والليل اجاني
طبك جم باب جان بوجهي مفتوح
وجم عش الحميته وما حماني
الوفه كتابه بثلج والكيته ممسوح
عذرته المانسه جروحه ونساني
يافي النخل ياريع السفوح
يا اول حضن غالي اشتراني
اشتريني ردود حالت بيه الجروح
نكعت بدوه الغربه وما شفاني
مد ايدك واخذني بعيد ما الوح
وارضه شما يصح يمك مجاني
كوخ اهلي ولا كل هاي الصروح
حملني بحلوتي ومري وحواني
وتمر عثوكهم بالجوع مسموح
حلال والذ من زاد الصواني
وماي اشراب بايت فوك السطوح
زلال الغربه يزهي وما رواني
يا جا يا لعد ياحجي المملوح
رطين الماصخ معشش بذاني
اعذروني غناي بصوت مبحوح
امس يا ما ترست الليل اغاني
عبر وكت الغنه وطور الحزن نوح
صرت الحم جرح يطلعله ثاني