حامد الشمري
من وعينا اللوعة بينا
ومن وعينا والظرف قاسي
جان بينا البيت مبني
الاساس ضلوع جدي
والسكف دمعات ناسي
وصدر ابوي الباب اذكر
وجانت الحيطان اخوتي
وامي ربة بيت اذكر
تعقد ويا الموته اماسي
وعدنا علاكة عتيجة لهسه اذكر
هم شليلة جنها حالي
تفتر السوك لاخيرة
ومن تخلصة تنترس حصرات تالي
ونرجع نركب حزنا بنبع دجلتنا البسيطه
وجي عمر ما عدنا سفرة
نصبه جنا اعلى الخريطة
جان توم ازغار عدنا
الوطن سماهم النا
الولد سماه فرات
والبنت سماها دجلة
يمرنا شط العرب يركض
حافي وعايف كرمته
اذا اباب البيت يسمع
طلعو بلعبون حجله
ماتو بيا حرب ناسي
بيا قصف بيا مدفعية
المهم ما جنفوهم
ولا رضى الدفان يحفر قط كبرهم
لان كال اورود ذوله
من اريد احفر كبرهم لازم الا بمزهرية
