عبد الوهاب الحمداني

وصّفوچ او گالوا اتطيحين لو مرّ الغروب
او زغّروچ او گالوا اتضيعين بتراب الدروب
او ما دروا عفّة ودادج عالية!
اعلى من نخل الجنوب
او غاوية!
اغوى من كلّ الذنوب!
يا ذنب ينزف اجر من ارتكبتچ!
او غلّگت بيبانهه التوبة او بعد ما بيّه اتوب
او طرّزت سمعي ابسواليفچ وِرد
او كحّلت شوفي ابحرز ما ينحسد
او لملمت شوك الفلح كلّه او لفيتچ
بس لگيتچ! هرفي زرعچ بالعشگ ما ينحصد!
او صادقت كلّ النياسين ابأمل فد يوم اشوفچ
او حلّفت ليل المدينة ايغار لو مرّن ازلوفچ
يالكبرتي ابجرحي ظل سچين والوادم ملح
ليش اجيتيني ابوكت ما بيه صلح
ليش كبّرتي الحلم والعين ضيگة؟!
ليش راويتي الوفه او بعتيني فرگة؟!
اذكر اعيونچ گبل سنتين صاحلّي تعال
او طاحت النجمة البعيدة ابحضنچ او شفتچ اهلال
اهلال
او ما كملتي ابروحي جيه دنيانه عوز
او جيه بنينه اعمارنه اعله اليمكن…او صدفة.. وايجوز
ايجوز نهران العناد البيچ تنشف
وايجوز تاريخ الخشونة البيّه يترف
وآنه بين ايجوز ذيچ او هاي حبل الشيب يلتف
او ترگص اچفوف الشماته بوجنة الدف
وانتِ ما مر اعله ضنّچ تعتنين
او لا يجي ابّالچ تجين
وانه دگّالي الوكت لحن المحطّة ابصوت ياس (امسافرين)
(امسافرين اوعيني مشدودة الدربكم)
(امسافرين او آخ لو عندي كلبكم)
چنت اغمّك للجلادة البيچ
لعيون العناد الشايله اعليهن علامة
او چنت اطلع كل مچامين البخل حتى ابسلامه
او ما دريت الحب تبدّل والگلب وشّل صبر والناس متروسة ملامة
إي… يروحي هذا مكتوبچ اصبري
او ضمّي شكوة ضيمچ اليوم القيامة
ضمّي شكوة ضيمچ الرب القيامة