عادل العيساوي

خلص عمري بطواري الوف
ومابين الحلم والروح سجة خوف
وخيالك يفتر الحيطان مثل الريل كل لحظه على عيني يطوف
عفت بيه الفرح مجتوف
وعفتني بحال ذاك الملتحق للجيش واجاه مرسال من عشكه
وظل محتار مابين الحبيب وضيعة التفكه
والمرسال جان يكول
رد بساع لاغيرك يجي ويستورح النعناع
رد بساع لاتبحر سفن عشكك وماتلكه اثر لشراع
ورد بساع وهم رجله وسبك كل ريح بس مالحك الزافوف
من روحي شيطلع الاوف
وانا مسير ورد والناس ملكه سيوف
كالو عوف \ كالو عوف
بطرانينين حقهم مادرو قصتي
من اكلك صباح الخير صباح الخير كل ظنهم انا مجنون
مايدرون اتجاوب صباح النور صوره بوسط محفظتي
ارجعلي يابعد الروح هيج اني الك مشتاك
لبسني هدم ملكه وانزع كلشي بيه افراك
وطرد كل عطر دخان وشممني مسج وزلوف
من اشمك كلشي بيه ايطيب
لايجذب عليك الشيب بعدهي رويحتي الخضره
صابر والصبر مريود ولوما صبر كل فلاح
جاهسه اخرس البستان وشفاف النخل ماسولفت تمره
ردلي ارجوك وكلشي البيه جيبه وياك
ولم روحك ضوه ونجمات وتمغظ على الشباك
ليل الله يمر صندوك تعال بنية الكمره