مالك السلطاني

لايطب ابينه الماضايك ادموع الحبيب
العشره حرمه.. وجف الموادع غريب!!
خير خو مابيك شي…
استهلكت عيني بغيابك
والحلم يابس وصلهه وكطره ماكو بمستحاته
آه لوتدري بحسرتي ..
حسرة المطلوب والديان واكفله بلهاته!!
كلب ادموعي اعله كيفك تلكه بيهن
شوغة ام اكبالهه يزفون مرت وليدهه الماصارله اكثر من شهر دورة وفاته!
بين بروحي النشاز ..
وكمت الفلفهه بصورك خاطر استر عيبهه
هذا حالي وداعتك . حال العجوز
التشتهي زياره ا(لشريفه)وكروه ماكو بجيبهه
بسمرت روحي اعله آخر شجره خطينه بضهرهه
فلان وفلان ونزل غيم الله وقع فوكهه.. شلون ذكره
بيهه خفنه من الهوه ليبوكهه!
بيهه حلفنه النده بكل الخضار وذمته شكلناهه خاف يضوكهه!!
جنت كلما انوي اعوفك ..
اعثر بريحة قميصك وارجع بلايه عذر
كمت اناغي بصورتك حتى بكفاهه ودمعت من كل كتر
شفافي عاجر
تحلم اتناغي ابتسامه وتشبك سنوني الهضيمه وانمرد
يابرد ياليله من ليلة جهنم يابرد!….
ورحت ادورك جانت الدنيه برد
والكاع صحره بعيني جانت رغم بيهه شكد ورد!!
وضلي جان وياي يمشي
وصدفه ماحس لن وكف ضلي ومشيت وصاحلي ارجع
هنا أشم ريحة عشكنه سنين ضاربته الشمس
هنا مسيت العافيه البيهه كعدنه وبيهه سولفنه اعله موضوع العرس
امي ماتعرفني عكبك.!
من اطب للبيت تسأل هذا المدولب منو
ياهضيمه العشره تاهت بيد وادم ماتعرف الحب شنو!!!!