محسن الموسوي

ضيعني هواك وضاعت سنيني
يل مابيك شي ظل واكف بعيني
كونك موش نورس جرفي شلك بي
اثر جدمك خشن وانه ترف طيني
خريفك هد خضاري وكتلك انه انسان
مو شجرة وربيع الجاي يحييني
سهرتك ظني حالك حال طبع الليل
شما طال لصبح لازم يوديني
شمدريني اعله طولك ليل يتبع ليل
چا ماكتلي بطل لا اتانيني
عيشة طيف مامسموع بيها الصوت
ولا جدمي بحلم يگدر يمشيني
طحت ظليت هاوي متاني اصد بكاع
ليمته بهذا كابوسك تخليني
أسمي بذكرياتك ضحكة حلوة وكيف
وبذاكرتي اسمك جمرة تچويني
اريد اطبگ جفن مابي صور وياك
اروحن وين منك وانت حاويني
الومك بس شغيّر والندم شيفيد
انكسر گلبك علي ؟ وشراح يعنيني
عفتني بلا نهاية بلا عطر لا لون
ماي ولوعطشت ابيش ترويني ؟
حط دمعة عله گبري وروح الله وياك
واغنية حزينة بليل غنيني
ولا لاتلتفت عمري اندفن بگفاك
وعالميت حرام النظرة تاذيني
تعاتبنا وبچينا وجان خوش اوداع
بي وياك راحن اجمل سنيني