بلال ابو الطيب

طگت الذكرى ونشف خلگ الزمان
منتظر نسيان فاهي وما يمر !!
كلشي زايد حتى چلمات السؤال
گوة نشهگ روحنه بطرف العمر
ارجف املاگه واعيش ابفي ضباب
كلهه تاهت حتى تمثال الصبر
خلصن الضحكات طوخنه انتباه
راحتي ابصفنات ختلات العذر..
اسمع السكتات لو رادن ونين
واسمع النسيان لو گال انتظر..
عايف المشتاگ مشتول بگفاه
وناسي طعم الراح لو هب السهر ..
كلش احتاجيت مو موضوع ليل
اكبر المخنوگ من وحشة گبر
كلهم يسمعون صدگ ما جفيت
وجان طولك ريح حدك للشبر..
غصب عن الفات تنطيني اهتمام
وما دريت الصوت بي يطفه الكبر
يصبغ السَود رچيچي وخله ناب
وطوخ بسالفتي عاشگ مختمر .
زارع بطيفك ملامح مو غريب
وتدري اشوفك حتى لو بيتك هجر..
انسى روحي وما اضيع مشتهاك
واشتهيك بواهس اغصاني الخضر….
ارجى ليل وما اعاند ذكريات
واعتلي بحيلين لو هاج الدهر
اطفى ثوب وما اواعد بس حمار
واشرب الغبشه واساليب السمر
انزع ادروبي واسير من جديد
واعلگ العايفني لو راي العبر
اترس اظنوني حمامات وربيع
وما اشك ابناس لو تشعل ستر
كلشي يهوى وينحسب وكت العناد
وما يشيل الورق لو غص السطر
تركض اللهفه اب أمل سنطة وذهول
واليوچد بيهه اثر صوت وعطر
يا دمار العايف بريته العبير
شلون يتنفس هوه بنية سفر
يا سوالف عثرت بنبض الخضار
وما تلوح الوان رسمتهم صفر
سولة الطيب اجازيهه ابوداع
ومن اصالح غايتي بگد القدر