صباح العتابي

عفت كل حلم عاش أمن الزغر وياي
وشكلت اسنيني ذمه برگبة البارود
وعاشرت السهر بس مو سهر عشاگ
سهر گطرة نده ومالگت حضن اورود
النهار إِبلا ضوه متوارد اويه الليل
وبخيوط الفجر گوه الخلگ مشدود
منو ايدايني فرحه بگد خلگ مجنون
اريد ايمر ضوه يبدل اضنوني لسود
اريد اجناح اليطيحني بس أبعيد
ولو مابدل اسمي بچلمة المفگود
الدمع فرهد اعيوني ومن يغيب انخاه
ما احمل هجر واترجه حزني يعود
النخله التنحوي صح بالگلب تنصاب
بس تشبع قهر لو ما اجه الصاعود
جبت عمري بتعب والراحه حصت الغير
وهذن طعنات ربعي اعلئ الكلام شهود
خيط ولامهم لو رحت يتطشرون
وتاه احسابهم وانه الصرت شاهود
طبع بيرغ وينهاب الوگف جواي
برغم ماراسي من كثر الهموم ينود
أصيح ابروسهم والصدئ يرد فشلان
واجيهم والگه باب اگلوبهم مسدود
وانا اگبالهم بديت شوفي ادموع
ومن عطشو نفس خليت ريتي بجود
نخوني وصرت حضره وماشفت زوار
وصرتلهم علگ بس مالگيت ازنود
صوچي وامنيت اشموعي يم الريح
وانالوديت ثلجي اعلئ الشمس هادود
الورد مايدري بيش ايفكر العاگول
ولاتدري الطريده بحيلة الصايود
من تالي انتبه گلبي وعرف شيريد
وفرزن ربعه زين ولگه لكلشي احدود
گلبي وماجذب من گال اجاني الموت
السنابل تشم دمهه بريحة الحاصود