زهير العرماني: في رثاء الشهيد الشاعر علي رشم

بعد حزني عليك لهسه ما بادي
بعد بيك بحلم مرعوب ما فزيت
حته اقلق واظلن حالي مترادي
بعدني وداعتك ما ظال بالي اعليك
مفتوحه شهيتي واضحك ومرتاح
ما لاچــمني گلبي وغاص بزادي
ما تسأل علي شو صار فتره شبيك
عني الشاغلك من ضمن حسادي
يحسدوني بمحبتك واعرف يغارون
انه زعلان منك ليش هيچ تغيب
يل حافظني من اجلادي لجلادي
عليمن بعد تسأل يل حرگت الروح
وانه ناري طفت واتطشر ارمادي
وانه اسأل عليك هواي
واسمع صوتك وارتاح لو باذني ايتنفس ناي
طاريك يمر وي عصرة ازنادي
ينزف صاحبك صوت الهوه ينادي
جرحك عادي گلت يگوم منهه بخير
بس جرحي بغيابك ابد مو عادي
بس انه احسد الزاروك
صدرك چان كاشخ بالشظايه ومبتسم شافوك
انه بحسرة البوسه شلون
من گصة بطل ما ماخذ مرادي
گالولي متت وادري الخبر موثوق
بس ماريد اصدگ وابقى بعنادي
خل اجرع افراگك زين .. خل تحبل دموع العين
خل اصبر وادورك بين كل الناس
بلكي الله يحبني وخالقك مرتين
انه شلون اقتنع گلبي گلب جاهل
مال انته متت سولفها يم عاقل
لحد الآن اراهن بعدك اتقاتل
تدري شوكت ميت يا علي اعتبرك
من يتجرأ الموت ويجي بسكوت
ويشوفك جريح ونفذ كل صبرك
اذا ردت الصدگ مريت يم گبرك
من نورك شفت تتمكيج الگمره
وعيون العشگ تهمل عطر گد ما بچت حمره
استفزيتك وعاتبتك وانه اترجاك تعذرني
لأن مو جاي اختبرك
شفت روحي ازغر من النمله
وانته شگدك شكبرك
اشم بتراب گبرك ريحة الجوري
من يوم الغبت ما برد شاجوري
دعيت الله الخذاك من الجرف ناطور
ربي ارجوك رَجِع صاحبي وماريد ناطوري
يعريس الرصاص بزفتك للموت انه اتمنيت تدعيني
حقك صادقت كل اصدقاء حسين
حته بطيف ما شفتك تواسيني
يشعلان الشعر ياترف روحك خضره
تتغزل بحور العين ناسيني
ما حاسب احساب ارثيك يل حالفلي ترثيني
شقاك يغثني واتعارك وياك بساع
ما انغث بعد واغتاظ ابوس ايدك
تعال شويه شاقيني
على باب السمه الحضنتك دليني
من بين النجم بلكت تحاچيني
حته ترد وحشتي بصفنه تالي الليل
افرغ هم البراسي وتسليني
اقره الفاتحه لروحك واشك بروحي
من اقرالك الاخلاص   
خاف بگلبي ماكو اخلاص
يامن رخص دمك للوطن واعداك ناس ارخاص
اسمك كون ينحط ماركه اعله القلم والقناص
لجلك ملحمة اكتب موش مرثية
واللون بالغزل موسوعة حربية
يمن خليت باذن اعداك ترچية
بالمحشر واميزك من تجي ويالناس
تجي لابس جروح الشعر بيرية
يل فزعتك غيره بكل ضمير تعيش
الف هنيالك وتستاهل الفردوس
ماوصيك لاتنسه قبل لتموت مر بيه